Category: ఇంటర్వ్యూలు

*వైకాపా అభ్యర్థుల జాబితాను రేపు ప్రకటించనున్నారు. ఆ పార్టీ అధ్యక్షుడు జగన్‌మోహన్‌రెడ్డి ఆదివారం ఉదయం విశాఖపట్నంలో ఈ జాబితాను విడుదల చేసే అవకాశం ఉంది. వాస్తవానికి శనివారం ఉదయం 10:26 గంటలకు ఇడుపులపాయలో జాబితా విడుదల చేయాలని నిర్ణయించారు. తన బాబాయి వైఎస్‌ వివేకానందరెడ్డి హత్య జరిగిన నేపథ్యంలో జాబితా ప్రకటన కార్యక్రమాన్ని వాయిదా వేశారు. పిడుగురాళ్లలో నిర్వహించవలసిన తొలి ఎన్నికల ప్రచార సభనూ రద్దు చేసుకున్నారు. ఆదివారం నుంచి రోజుకు మూడు జిల్లాల్లో మూడు నియోజకవర్గాల్లో ప్రచారం కొనసాగుతుంది.
*టికెట్ రాకుంటే ఇండిపెండెంట్‌గా పోటీచేస్తా- భూమా బ్రహ్మానంద
126 మంది టీడీపీ అధిష్టానం తొలిజాబితాను విడుదల చేసిన సంగతి తెలిసిందే. అయితే కర్నూలు జిల్లాలో ఆళ్లగడ్డ అభ్యర్థిగా మంత్రి భూమా అఖిల ప్రియను ఖరారు చేయగా.. నంద్యాల మాత్రం పెండింగ్‌లో పెట్టారు. అయితే రెండో జాబితాలో కచ్చితంగా తన పేరు ఉంటుందని టికెట్ తనదేనని.. భూమా బ్రహ్మానందరెడ్డి ధీమా వ్యక్తం చేస్తున్నారు. కాగా.. ఇదివరకే నంద్యాల టికెట్ విషయమై అఖిల మాట్లాడుతూ కచ్చితంగా నంద్యాల టికెట్ మాదేనని చెప్పిన విషయం విదితమే.
*ఎమ్మెల్యేల కొనుగోలు చూడలేకే పోటీ- రేవంత్‌
ముఖ్యమంత్రి కేసీఆర్‌ సొంత పార్టీ నాయకులను హీనంగా చూస్తూ ప్రత్యర్థి పార్టీల నుంచి నేతలను కొనుగోలు చేస్తున్నారని కాంగ్రెస్‌ నేత రేవంత్‌ రెడ్డి మండిపడ్డారు. పార్టీ ఫిరాయింపులను ప్రోత్సహించడం వల్ల ప్రజలకు ఏమైనా ప్రయోజనముందా? అని ప్రశ్నించారు. పదవి కోసం తాను పని చేయట్లేదని, పార్టీ కోసమే కష్టపడుతున్నానని స్పష్టం చేశారు. ఎమ్మెల్యేల కొనుగోలును చూడలేకే ఎన్నికల్లో పోటీ చేస్తున్నానని అన్నారు.
*వచ్చేది సంకీర్ణ ప్రభుత్వమే
లోక్‌సభ ఎన్నికల తర్వాత కేంద్రంలో అధికారంలోకి వచ్చేది సంకీర్ణ ప్రభుత్వమేనని, దీన్ని అర్థం చేసుకొనే ఓటర్లు ప్రాంతీయ పార్టీల వైపు నిలుస్తున్నారని నిజామాబాద్‌ ఎంపీ కల్వకుంట్ల కవిత అన్నారు. స్థానిక పార్టీలను, జాతీయ, అంతర్జాతీయంగా ఆలోచనలు చేసే దృక్పథం కలిగిన నేతలను ప్రజలు కోరుకుంటున్నారన్నారు. నిజామాబాద్‌లో ఈ నెల 19న నిర్వహించే ఎన్నికల బహిరంగ సభ ఏర్పాట్ల పరిశీలనకు శుక్రవారం ఇక్కడికి వచ్చిన ఆమె, మంత్రి ప్రశాంత్‌రెడ్డి, ఎమ్మెల్యే గణేష్‌గుప్తాతో కలిసి విలేకరులతో మాట్లాడారు.
*హత్య చేసిన వారిని ఉరితీయాలి
వైఎస్‌ వివేకానందరెడ్డి హత్యకు కారకులైన వారిని ఉరి తీయాలని మంత్రి ఆదినారాయణరెడ్డి అన్నారు. ఎంపీ టికెట్‌ విషయంలో అవినాష్‌రెడ్డి, వివేకానందరెడ్డి కుటుంబాలకు విభేదాలున్నాయని చెప్పారు. వీరి మధ్య అంతర్గత యుద్ధం కొనసాగుతోందని తెలిపారు. గతంలో విజయమ్మపై వివేకానందరెడ్డి పోటీ చేసినప్పటి నుంచి జగన్‌, వివేకా కుటుంబాలకు అంతరం ఏర్పడిందన్నారు. వాళ్ల ఇంట్లో జరిగిన ఘటనను తనకు ఆపాదించడం ఎంతవరకు సబబని ప్రశ్నించారు. ఎన్నికల్లో తనను నిజాయతీగా ఎదుర్కొనే ధైర్యం లేక రాజకీయంగా పబ్బం గడుపుకోవడానికే జగన్‌ తప్పుడు ఆరోపణలు చేస్తున్నారని మండిపడ్డారు.
*చంద్రబాబు, లోకేష్‌ సూత్రధారులు
మాజీ మంత్రి వైఎస్‌ వివేకానందరెడ్డి హత్యపై సీబీఐతో విచారణ జరిపించాలని వైకాపా ఎంపీ విజయసాయిరెడ్డి డిమాండ్‌ చేశారు. శుక్రవారం ఆయన హైదరాబాద్‌ లోటస్‌పాండ్‌లోని వైకాపా కేంద్ర కార్యాలయంలో విలేకరులతో మాట్లాడారు. వివేకానందరెడ్డి హత్యకు సూత్రధారులు ముఖ్యమంత్రి చంద్రబాబు, ఆయన తనయుడు లోకేష్‌, అమలు చేసింది మంత్రి ఆదినారాయణరెడ్డి అని ఆరోపించారు. ‘జమ్మలమడుగు, కడప నియోజకవర్గాలకు వివేకానంద ఎన్నికల బాధ్యుడిగా వ్యవహరిస్తున్నారు. ఆయనుంటే తనకు రాజకీయ మనుగడ ఉండదనే భయంతో చంద్రబాబు, లోకేష్‌ మద్దతుతో ఆదినారాయణరెడ్డి ఈ హత్య చేయించారు.
*రాహుల్‌జీ కర్ణాటక నుంచి పోటీచేయండి
కాంగ్రెస్‌ అధ్యక్షుడు రాహుల్‌గాంధీ కర్ణాటక నుంచి పోటీ చేయాలన్న ప్రతిపాదనలు ఊపందుకున్నాయి. మాజీ ముఖ్యమంత్రి సిద్ధరామయ్య, పీసీసీ అధ్యక్షుడు దినేశ్‌గుండూరావు తదితరులు ట్విటర్‌ వేదికగా తమ అభిమతాన్ని శుక్రవారం వ్యక్తం చేశారు. గతంలో రాహుల్‌ నానమ్మ ఇందిరాగాంధీ, అమ్మ సోనియాగాంధీ కూడా కర్ణాటక నుంచి పోటీ చేసి విజయం సాధించారు. ఆ సంప్రదాయాన్ని కొనసాగిస్తూ రాహుల్‌ కర్ణాటక నుంచి పోటీ చేయాలని సిద్ధరామయ్య కోరారు. ‘భావి ప్రధాని రాహుల్‌గాంధీ కర్ణాటక నుంచే పోటీ చేసి గెలవాలి’ అని ఆశాభావం వ్యక్తం చేశారు. పీసీసీ అధ్యక్షుడు దినేశ్‌ గుండూరావు స్పందిస్తూ ఈ విషయంపై రాహుల్‌గాంధీతో చర్చిస్తామని చెప్పారు.
*ఏపీలో తెదేపా లోక్‌సభ అభ్యర్థుల జాబితా కొలిక్కి
తెలుగుదేశం లోక్‌సభ స్థానాల అభ్యర్థుల ఎంపిక కసరత్తు కొలిక్కి వస్తోంది. ముందుగా శుక్రవారం లోక్‌సభ అభ్యర్థుల్ని ప్రకటించాలనుకున్నా మాజీ ఎంపీ వివేకానందరెడ్డి హత్యతో వాయిదా పడింది. శనివారం తిరుపతిలో లోక్‌సభ అభ్యర్థుల జాబితాను చంద్రబాబు విడుదల చేయనున్నారు. లోక్‌సభ స్థానాలకు అభ్యర్థులుగా ఒంగోలు నుంచి శిద్దా రాఘవరావు, నెల్లూరు నుంచి బీద మస్తాన్‌రావు, రాజమహేంద్రవరం నుంచి మాగంటి రూప ఖరారయ్యారు.
*ఏపీలో నేటి నుంచే తెదేపా ఎన్నికల శంఖారావం
తెదేపా జాతీయ అధ్యక్షుడు, ఏపీ ముఖ్యమంత్రి చంద్రబాబు నాయుడు శనివారం తిరుపతి నుంచి ఎన్నికల ప్రచార శంఖారావం పూరించనున్నారు. అంతకు ముందుగా ఆయన తిరుమలలో శ్రీవారిని దర్శించుకోనున్నారు. ఇందుకోసం సతీమణి భువనేశ్వరి, కుమారుడు, మంత్రి లోకేశ్‌, కోడలు బ్రాహ్మణి, మనవడు దేవాన్ష్‌తో కలిసి ఉదయం 11 గంటలకు చంద్రబాబు తిరుమల చేరుకుంటారు. శ్రీవారిని దర్శించుకున్న అనంతరం తిరుపతికి చేరుకుని తారకరామ స్టేడియంలో జరిగే బహిరంగసభలో పాల్గొంటారు. ఎన్నికల ప్రచారానికి శ్రీకారం చుడతారు. అక్కడి నుంచి బయలుదేరి సాయంత్రం 5.30 గంటలకు శ్రీకాకుళం చేరుకుంటారు. అక్కడ జిల్లా నాయకులు, కార్యకర్తలతో సమావేశమవుతారు. రాత్రి అక్కడే బస చేస్తారు. ఆదివారం విజయనగరం, విశాఖపట్నం, తూర్పు, పశ్చిమ గోదావరి జిల్లాల నాయకులు, కార్యకర్తల సమావేశాలకు హాజరవుతారు. సోమవారం కృష్ణా, గుంటూరు, ప్రకాశం, నెల్లూరు జిల్లాల్లోనూ, మంగళవారం అనంతపురం, కడప, కర్నూలు జిల్లాల్లోనూ సీఎం పర్యటిస్తారు. అన్ని జిల్లాల్లో నాయకులు, కార్యకర్తలను కలిశాక ముఖ్యమంత్రి ప్రజల్లోకి వెళతారు.
*నియమావళి ఉల్లంఘన అంటూ.. కేసీఆర్‌పై సీఈవోకు కాంగ్రెస్‌ ఫిర్యాదు
: ‘ప్రగతి భవన్‌’ వేదికగా రాజకీయ కార్యకలాపాలు నిర్వహించడం ఎన్నికల నియమావళి ఉల్లంఘన కిందకే వస్తుందని కాంగ్రెస్‌ పార్టీ ఎన్నికల సంఘం సమన్వయ కమిటీ ఆరోపించింది. కన్వీనర్‌ నిరంజన్‌ శుక్రవారం ఈ మేరకు తెలంగాణ ముఖ్య ఎన్నికల అధికారి (సీఈవో) రజత్‌కుమార్‌కు ఫిర్యాదుచేశారు. ముఖ్యమంత్రి కేసీఆర్‌ ఇతర పార్టీల ఎమ్మెల్యేలను ప్రగతి భవన్‌కు పిలిపించి మాట్లాడుతున్నారని, తెరాసలో చేరాలని ప్రలోభాలకు గురిచేస్తూ అధికార దుర్వినియోగానికి పాల్పడుతున్నారని విమర్శించారు. సంబంధించిన వార్తల క్లిప్పింగులను సీఈవోకు సమర్పించిన నిరంజన్‌.. ఇకముందు ఇటువంటివి పునరావృతం కాకుండా కేసీఆర్‌పై చర్యలు తీసుకోవాలన్నారు.
*మోదీ ఓటమికి మద్దతు ఇవ్వాలి
వచ్చే సార్వత్రిక ఎన్నికల్లో వారణాశిలో ప్రధాని నరేంద్ర మోదీని ఓడించడానికి కాంగ్రెస్‌తో సహా అన్ని పార్టీల మద్దతును తాను ఆహ్వానిస్తున్నానని భీంసేన అధ్యక్షుడు చంద్రశేఖర్‌ అజాద్‌ వెల్లడించారు. దిల్లీలో జరిగిన ప్రదర్శన అనంతరం శుక్రవారం ఒక వార్తా సంస్థతో ఆయన మాట్లాడారు. తనకైనా మద్దతివ్వాలని లేదా కనీసం తమ పార్టీల నుంచి ములాయం, అఖిలేష్‌, మాయావతిల్లో ఎవరో ఒకరిని రంగంలోకి దింపాలని ఎస్పీ, బీఎస్పీలకు విజ్ఞప్తి చేశారు. మోదీ అభ్యర్థిత్వాన్ని భాజపా ప్రకటించాల్సి ఉంది.
*12 మంది సిట్టింగ్‌ ఎంపీలకు అవకాశం లేనట్లే..!
అధికార పార్టీ ఎంపీలపై ఉన్న వ్యతిరేకత కారణంగా మధ్యప్రదేశ్‌లో దాదాపు 12 మంది సిట్టింగ్‌ సభ్యులకు భాజపా ఈసారి టిక్కెట్లు ఇవ్వకపోవచ్చని ఆ పార్టీ నేత ఒకరు శుక్రవారం తెలిపారు. గత అసెంబ్లీ ఎన్నికల్లో భాజపా ఓటమి పాలైన విషయాన్ని ఆయన గుర్తుచేశారు. పనితీరు సరిగా లేకపోవడం, ప్రజల్లో వ్యతిరేకత కారణంగా అప్పట్లో 80 మంది సిట్టింగ్‌ ఎమ్మెల్యేలకు టిక్కెట్లు ఇవ్వొద్దంటూ సర్వేల్లో తేలిందన్నారు. ఆ నివేదికలను పార్టీ పట్టించుకోకపోవడమే అప్పటి ఓటమికి కారణంగా విశ్లేషించారు. గత అసెంబ్లీ ఎన్నికల్లో భారీ మూల్యం చెల్లించినందున ఈసారి మళ్లీ అలాంటి తప్పు చేయకపోవచ్చని అభిప్రాయపడ్డారు.
*పశ్చిమబెంగాల్‌లో 25 మందితో వామపక్ష ఫ్రంట్‌ తొలి జాబితా
పశ్చిమబెంగాల్‌లో సీపీఎం నేతృత్వంలోని వామపక్ష ఫ్రంట్‌ 25 లోక్‌సభ స్థానాలకు అభ్యర్థులను ఖరారు చేస్తూ శుక్రవారం తొలి జాబితాను ప్రకటించింది. ఈ జాబితాలో నలుగురు మహిళలు, ఐదుగురు ముస్లిం అభ్యర్థులకు చోటు కల్పించింది. లోక్‌సభ ఎన్నికలకు సంబంధించి రాష్ట్రంలో తొలిసారిగా కాంగ్రెస్‌తో సీట్ల సర్దుబాటు చేసుకుని వామపక్ష ఫ్రంట్‌ బరిలోకి దిగుతోంది. మిగిలిన 17 స్థానాల్లో కొన్నింటిలో కాంగ్రెస్‌, మరికొన్ని చోట్ల వామపక్ష ఫ్రంట్‌లు పోటీ చేస్తాయని పశ్చిమ బెంగాల్‌ వామపక్ష ఫ్రంట్‌ ఛైర్మన్‌ బిమన్‌ బోస్‌ ఓ ప్రకటనలో తెలిపారు. కొన్నిచోట్ల కాంగ్రెస్‌, వామపక్ష ఫ్రంట్‌లు సంయుక్తంగా మద్దతిచ్చిన అభ్యర్థులు బరిలోకి దిగే అవకాశం ఉందని పేర్కొన్నారు. జాదవ్‌పుర్‌ లోక్‌సభ స్థానం నుంచి కోల్‌కతా మాజీ మేయర్‌, సీపీఎం నేత బికాస్‌ రంజన్‌ భట్టాచార్య బరిలోకి దిగనున్నారు. పురిలియా, బరాసత్‌ స్థానాలను తమకే కేటాయించాలని కాంగ్రెస్‌ పట్టుబడుతున్నట్లు తెలుస్తోంది.
*బీఎస్పీతో జనసేన పొత్తు
జనసేన పార్టీ పొత్తులపై దృష్టి సారించింది. ఉభయ కమ్యూనిస్టు పార్టీలతో పాటు బీఎస్పీతోనూ పొత్తు కుదర్చుకుని సార్వత్రిక ఎన్నికల్లో పోటీకి సిద్ధమవుతోంది. రాజమహేంద్రవరంలో పార్టీ ఆవిర్భావ సభ తర్వాత జనసేన అధినేత పవన్‌కల్యాణ్‌, పార్టీ నాయకుడు నాదెండ్ల మనోహర్‌లు నేరుగా ఉత్తరప్రదేశ్‌లోని లఖనవూ వెళ్లారు. శుక్రవారం బీఎస్పీ అధ్యక్షురాలు మాయావతితో పవన్‌ సుదీర్ఘ చర్చలు జరిపారు. దాదాపు రెండున్నర గంటల పాటు అనేక అంశాలపై వీరు చర్చించుకున్నారు. ఆంధ్రప్రదేశ్‌కు పవన్‌ కల్యాణ్‌ ముఖ్యమంత్రి కావాల్సిన అవసరం ఉందని ఈ సందర్భంగా మాయావతి ఆశాభావం వ్యక్తం చేసినట్లు జనసేన విడుదల చేసిన ప్రకటన వెల్లడించింది. ‘జనసేన, వామపక్షాలతో కలిసి ఆంధ్రప్రదేశ్‌ ఎన్నికల్లో పోటీ చేస్తాం’ అని ఆమె పేర్కొన్నట్లు పార్టీ వివరించింది. బీఎస్పీ ఏయే స్థానాల నుంచి పోటీ చేసేదీ రెండు మూడు రోజుల్లో తేలుస్తామని పేర్కొంది. ఏప్రిల్‌ 3, 4 తేదీల్లో ఆంధ్రప్రదేశ్‌, తెలంగాణ రాష్ట్రాల్లో మాయావతి, పవన్‌ కల్యాణ్‌ సంయుక్తంగా ఎన్నికల సభల్లో పాల్గొననున్నారు.

ముఖ్యమంత్రి చంద్రబాబు పై ఆయన తోడల్లుడు దగ్గుబాటి వెంకటేశ్వరరావు తీవ్రస్థాయిలో విరుచుకుపడ్డారు. వ్యవస్థలను నిర్వీర్యం చేయడంలో చంద్రబాబు దిట్ట అని అన్నారు. అంతేకాకుండా చంద్రబాబు పై సోషల్ మీడియాలో వస్తున్న తిట్లు, కామెంట్లు, చూస్తుంటే.. ఆయనపై జాలేస్తుందని సిఎం కుర్చీలో తానూ ఉంటే ఓ గంట కూడా కూర్చోలేనని దగ్గుబాటి వ్యాఖ్యానించారు. చంద్రబాబు పై తానూ అసూయ పడటం లేదని కేవలం జాలి పడుతున్నానని అన్నారు. చంద్రబాబు వద్ద పని చేసే అధికారులే ఆయన గురించి సరిగ్గా చేబుతారంటూ ఎద్దేవా చేశారు. దగ్గుబాటి వెంకటేశ్వరావు మంగళవారం మీడియాతో మాట్లాడుతూ నా తోడల్లుడు చంద్రబాబు సృష్టిలోనే వింత జీవి . నిన్న ఒకమాట.. నేడు ఒకమాట .. మాట్లాడుతున్నారు. పోలవరం ప్రాజెక్టు ప్రత్యెక హోదా పై ఎప్పుడు ఏం మాట్లాడతారో ఆయనకే తెలీయదు. నిన్న మోడీని నేడు రాహుల్ గాంధీని పొగుడుతారు. రాజధాని భూములను ఒక్కొక్కరికి ఒక్కో రేటుకు ధారాదత్తం చేశారు. గ్రాఫిక్స్ తోనే డిజైన్లు చూపుతూ కలం గడుపుతున్నారు. కేంద్రం నుంచి వచ్చిన నిధులతో తాత్కాలిక నిర్మాణాలు చేపడుతున్నారు. కేంద్రానికి తప్పుడు నివేదికలు ఇస్తున్నారు. కనకదుర్గమ్మ ప్లై ఓవర్ నిర్మాణం ఏళ్ల తరబడి జరుగుతోంది. ఉక్కు ప్యాక్టరీ, రామయపట్నం పోర్టుల గురించి రాష్ట్ర ప్రభుత్వం కేంద్రానికి నివేదికలు ఇవ్వలేదు. ఎన్నికల కోసం మేమే చేస్తామని ఇప్పుడు శంకుస్థాపనలు చేస్తున్నారు. చంద్రబాబు అధికారం కోసం ఏమైనా చేస్తారు. పోలీస్ వ్యవస్థతో పాటు అన్ని వ్యవస్ధలను ఆయన భ్రష్టు పట్టించారు. ప్రతిపక్ష పార్టీ ఎమ్మెల్యేలను కొనే బాద్యతను ఇంటలిజెన్స్ ఐజీకి అప్పగించారు. ప్రతిపక్షంలో ఉన్నవారికి కంట్రాక్టులు అప్ప చెపుతామని ఐజీ ప్రలోభాపెడుతున్నారు. స్పీకర్ వ్యవస్థను కూడా దిగాజర్చేశారు. స్పీకర్ వ్యవస్థను తూట్లు పొడుస్తూ ఫిరాయింపులను ప్రోత్సహిస్తున్నారు. ఇక ఆంధ్రజ్యోతి రాధాకృష్ణ జర్నలిజాన్ని నిర్వీర్యం చేశారు. చంద్రబాబు హయాంలో కడుతున్న ప్రాజెక్టుల్లో రాధాకృష్ణకు కమీషన్లు అందాయి. పట్టిసీమ ప్రాజెక్టు పై రాధాకృష్ణ వాస్తవాలు బయటపెట్టగలరా? పట్టిసీమ, పోలవరం, హింద్రీనీవా పనుల్లో ఆయనకు ముడుపులు అందాయి. ప్రజలకు మేలు చేసేలా రాధాకృష్ణ జర్నలిజం లేదు అని మండిపడ్డారు.

ప్రజాసేవకు తెదేపా ప్రభుత్వమే నిదర్శనమని విజయవాడ ఎంపీ కేశినేని శ్రీనివాస్‌ అన్నారు. కృష్ణా జిల్లా చందర్లపాడు మండలం చింతలపాడులో బుధవారం నిర్వహించిన జన్మభూమి గ్రామసభలో ఆయన మాట్లాడారు. గ్రామాల్లో నెలకొన్న సమస్యల పరిష్కారానికి అధికారులు, ప్రజాప్రతినిధులను జన్మభూమి కార్యక్రమం ద్వారా ప్రజల ముంగిటకు తీసుకొస్తున్న ఘనత ముఖ్యమంత్రి చంద్రబాబుకు దక్కిందన్నారు. నిరంతరాయంగా విద్యుత్తు సరఫరా చేస్తూ కోతలు లేకుండా చేశారని తెలిపారు. సమస్యల పరిష్కారానికి నిరంతరం శ్రమిస్తున్న మంత్రి నారా లోకేష్‌కు భవిష్యత్తులో ముఖ్యమంత్రి అయ్యే అర్హత నూరు శాతం ఉందన్నారు. ప్రధాని నరేంద్రమోదీ ఇష్టమొచ్చినట్లు మాట్లాడితే సహించేది లేదని, ఆయనకు సమాధానం చెప్పడానికి నేనొక్కడిని చాలన్నారు. విద్యార్థుల భవిష్యత్తును దృష్టిలో ఉంచుకొని రాష్ట్రంలో పరిశ్రమలు ప్రారంభించడానికి ముఖ్యమంత్రి కృషి చేస్తున్నారని చెప్పారు.

శబరిమల విషయంలో సుప్రీంకోర్టు ఇచ్చిన తీర్పును కేరళ ప్రభుత్వం అమలు చేస్తుంటే భాజపా, ఆర్‌ఎస్‌ఎస్‌ రాద్ధాంతం చేస్తున్నాయని సీపీఐ జాతీయ కార్యదర్శి నారాయణ ఆరోపించారు. కోర్టు తీర్పును గౌరవించాల్సింది పోయి కావాలనే అలా చేస్తున్నాయని ఆయన మండిపడ్డారు. విజయవాడలోని దాసరి భవన్‌లో మీడియాతో ఆయన మాట్లాడారు. కేరళలో ప్రభుత్వాన్ని కూల్చేందుకే ఇలాంటి ఘటనలకు పాల్పడుతున్నారని విమర్శించారు. గతంలో సుప్రీంకోర్టు తీర్పుతో మహారాష్ట్రలోని శని సింగనాపూర్‌ ఆలయంలోకి మహిళల ప్రవేశాన్ని సమర్థించిన భాజపా సంకీర్ణ ప్రభుత్వం.. శబరిమల అంశాన్ని ఎందుకు రాజకీయం చేస్తోందని ప్రశ్నించారు. రాజకీయ లబ్ధి కోసం దేవాలయాలను అడ్డుపెట్టుకోవడం విచారకరమని నారాయణ వ్యాఖ్యానించారు. ఇప్పటికే ఐదు రాష్ట్రాల ఎన్నికల్లో మోదీ ప్రభుత్వానికి ఎదురుదెబ్బ తగిలిందని నారాయణ చెప్పారు. నోట్ల రద్దుతో సామాన్య ప్రజలు, రైతులు మాత్రమే ఇబ్బందులకు గురయ్యారని చెప్పారు. తెదేపా అధినేత, సీఎం చంద్రబాబు జనసేన అధినేత పవన్‌ను ఆహ్వానిస్తున్నారని.. సీపీఐ, సీపీఎం, జనసేన కలిసి పోటీ చేస్తాయని, ఈ విషయంలో మరో ఆలోచనే లేదన్నారు. పవన్‌ను నిన్నటి వరకు విమర్శించిన చంద్రబాబు.. ఇప్పుడు ఆయనను ఆహ్వానించడం ఆశ్చర్యంగా ఉందని చెప్పారు. చంద్రబాబుకు ఓటమి భయం పట్టుకుందని, అందుకే పవన్‌ మద్దతు కోరుతున్నట్లు అనిపిస్తోందని నారాయణ వ్యాఖ్యానించారు.