తిరుపతి బరిలో ఇద్దరు మాజీ తితిదే చైర్మన్లు

ఆధ్యాత్మిక నగరంగా పేరుగాంచిన తిరుపతి నియోజకవర్గంలో ఈసారి ఎన్నికల్లో ఆసక్తికర పోటీ నెలకొంది. ఈ సెగ్మెంట్‌ నుంచి బరిలో ఉన్న రెండు ప్రధాన పార్టీల అభ్యర్థులు ఇంతకు ముందు తిరుమల తిరుపతి దేవస్థానం(టీటీడీ) ఛైర్మన్‌గా పనిచేసిన వారే కావడం గమనార్హం. జనసేన నుంచి బరిలో ఉన్న చదలవాడ కృష్ణమూర్తికి తెలుగుదేశం ప్రభుత్వం 2015లో టీటీడీ ఛైర్మన్‌గా అవకాశం ఇచ్చింది. ఆ తరువాత జరిగిన పరిణామాల నేపథ్యంలో గత సంవత్సరం ఆయన తెలుగుదేశం పార్టీకి రాజీనామా చేసి జనసేన తీర్థం పుచ్చుకున్నారు. ఈ ఎన్నికల్లో తిరుపతి నుంచి జనసేన తరఫున శాసనసభకు పోటీ చేస్తున్నారు. ఇదే నియోజకవర్గం నుంచి వైకాపా అభ్యర్థిగా పోటీలో ఉన్న భూమన కరుణాకరరెడ్డికి కూడా 2006లో కాంగ్రెస్‌ హయాంలో ఆ పదవి వరించింది. ఇంతకు ముందు టీటీడీ ఛైర్మన్లుగా పనిచేసిన ఇద్దరు వ్యక్తులతో పాటు, తెదేపాకు చెందిన సిట్టింగ్‌ ఎమ్మెల్యే ఎం.సుగుణమ్మ కూడా ఈ సారి తిరుపతి నియోజకవర్గం బరిలో ఉన్నారు. అయితే విజయం ఎవరిని వరిస్తుందో తెలుసుకోవడానికి మాత్రం మే 23వరకు వేచి చూడాల్సిందే. మరోవైపు ప్రస్తుతం తితిదే ఛైర్మన్‌గా పదవిలో ఉన్న పుట్టా సుధాకర్‌యాదవ్ కడప జిల్లాలోని మైదుకూరు నియోజకవర్గం నుంచి తెదేపా అభ్యర్థిగా శాసనసభకు పోటీ చేస్తుండడం విశేషం.

Leave a Reply

Your email address will not be published. Required fields are marked *

*

Enable Google Transliteration.(To type in English, press Ctrl+g)